Көкшетау қаласындағы №3 қазақ орта мектебін өткен ғасырдың 30-шы жылдарының соңында Кеңестер Одағының Батыры, академик, жазушы Мәлік Ғабдуллин тәмамдаса, 60-шы жылдардың басында белгілі ақын, драматург-жазушы Төлеген Қажыбай бітіріп, қанат қақты. Қазіргі таңда қазақ қоғамына танымал журналист, ақын Қорғанбек Аманжол да осынау қарашаңырақтан түлеп ұшты. Жетпісінші жылдардың басында белгілі боксшы, марқұм Қуанышбек Əжіғұлов, бүгіндері үш ауданда әкім болып қызмет атқарып, абырой-беделге ие болып жүрген Ерейментау ауданының қазіргі жетекшісі, елжанды азамат Ермек Нұғыманов та осынау мектептің мақтанышы. Қыркүйектің 20-сында 60 жасқа толатын Ермек Бекенұлының ерен еңбегі ол басшылық жасаған өңірлерде алтын әріптермен жазылып қалды. Интернат-пансионда оқыды талай бала, Олардың бірі – алғыр, бірі – шала. Жүзден жүйрік шыққандар – мақтанышы, Бөліп айтсам артық па жеке дара?! Дәріс алып Аманжолов Қорғанбектен, Мектепте ақын болып, өлең төккен. Нұғыманов Ермекті ел біледі, Əкім ол, халқына қалтқысыз қызмет еткен. Бастаған еңбек жолын жұмысшыдан, Бойына күш-қуатты жиыстырған. Қызмет баспалдағымен нық басып, Үш аудан жұртшылығын ұғыстырған. Бес уақыт қаза қылмай намазын, Иманға үйірген ауданның бар қазағын. Бекенұлы Ермекті үлгі тұтты, Ежелгі Ереймендік көп қауым. Тарихын Ерейменнің сан ақтарды, Жария етті батырлар мен боздақтарды. Рухын қайта жаңғыртуға Алашымның, Ерекең үлкен жоба жасаттырды. Қырқында қамал бұзып биіктеді, Жамандық, жемқорлыққа ілікпеді. Халқының қамын ойлап жүрген жігіт, Жауынан жасқанбады, үрікпеді. Алпысқа абыроймен жеттің бүгін, Серік әрі семсер болып тектілігің. Ұрпағы Сал Біржанның жаса, жайна, Алаштың ардақтысы, Ермек інім!

Қалымбек МҰХАМЕДЖАНОВ, Қазақстан Журналистер Одағының мүшесі. Көкшетау қаласы.