Сейсенбіде, 9 ақпанда, «Теплосервис» КМК-ның жиналыс залында «Нұр Отан» партиясы аудандық филиалының төрағасы, аудан әкімі Ермек Нұғымановтың төрағалығымен ХХІІІ кезектен тыс партия конференциясы өтті. «Нұр Отан» партиясы аудандық филиалы төрағасының бірінші орынбасары, партияның кезектен тыс ХVІІ съезінің делегаты Сара Дүйсембаева бірінші мәселе бойынша сөз сөйледі. Ол съездің алда өтетін Парламент Мәжілісіне сайлау қарсаңында шақырылғанын атап айтты. Сондықтан күн тәртібіне «Нұр Отан» партиясының «ҚАЗАҚСТАН- 2021: Бірлік. Тұрақтылық. Жасампаздық» жаңа сайлауалды тұғырнамасын бекіту мәселесі қойылды. Съезде кең ауқымды бағдарлама ұсынылды. Экономиканы тұрақтандыру, қоғамды биылғы Жолдауда, «100 нақтықадам» Ұлт жоспарында межеленген тапсырманы іске асыру жолында қазақстандықтардың бір кісідей жұмылу қажеттігі туралы ой айтылды. Бизнесті, ауыл шаруашылығын дамытуға, білім беру, денсаулық сақтау, мәдениет саласын жаңғыртуға көбірек ден қойылды. Бағдарламада мемлекеттің алдағы бес жылдағы дамуына қатысты көптеген идея айтылды. Ол аграрлық сала мен өнеркәсіпті жаңа ғылыми жетістіктер негізінде өркендетуді, өнім ұқсатылымын, заманауи технология енгізілімін бағытқа алады. Конференцияда 13 сайлау округі бойынша «Нұр Отан»партиясынан Ерейментау аудандық мәслихатының депутаттығына үміткерлер ұсынылды. Аудандық конференцияның делегаттары «Нұр Отан» партиясының Ақмола облыстық филиалының ХХV конференциясына партияның аудандық филиалы төрағасының бірінші орынбасары Сара Дүйсембаеваны, «ЕрейменТАУ - 2005» ЖШС директоры Темірболат Оразақовты делегат етіп ұсынды. Партия конференциясының күн тәртібіне енгізілген барлық мәселелер бойынша тиісті шешім қабылданды. Р.БАРЖАҚСЫ